Departamenti i Drejtësisë në Shkollën e lartë “Hëna e plotë” (Bedër) në bashkëpunim me klubin studentor “Bedër Law Academy” zhvilluan konferencën e 3-të studentore me temë “Sfidat e Drejtësisë Shqiptare në Procesin e Integrimit në Bashkimin Europian”.
Me pjesëmarrjen e rreth 18 studentëve nga cikli i parë dhe i dytë i studimeve, punimet e realizuara nën udhëheqjen e pedagogëve të departamentit të drejtësisë, trajtonin tema të ndryshme aktuale që përbëjnë sot thelbin e debatit në drejtësinë shqiptare.
Konferenca u zhvillua në 4 sesione të moderuara nga studentë të programit masteri, ku në çdo sesion referuesit paraqitën punimet e tyre që u vlerësuan me certifikata nga juria e përbërë nga pedagogë të universitetit. Bashkangjitur gjeni programi i konferences (shtojca 9).
Përpos çertifikatave, 5 punimet më të mira u vlerësuan edhe me çmime të tjera.
1. Besarta Prenga, me temën ‘’Sfidat e legjislacionit shqiptar në rrugën e harmonizimit me legjislacionin e Bashkimit Europian’’ ishte fituesja e çmimit të parë prej 150 Euro.
2. Redneks Dushi, me temën ‘’Korrupsioni në Shqipëri: Sfidë e rëndësishme drejt Integrimit Europian’’ u vlerësua me çmimin e dytë prej 125 Euro.
3. Fituesja e çmimit të tretë prej 100 Euro ishte studentja, Silvana Belishta me temën: ‘’Sfidat e Drejtësisë Shqiptare në rrugën e Integrimit Europian’’
4. Çmimi i katërt prej 75 Euro iu dha studentit Marinel Bregu me temën ‘’Reforma Gjyqësore: Sfidë e Integrimit rë Shqipërisë në Bashkimin Europian’’
5. Elton Ruda, ishte fitues i çmimit të pestë prej 50 Euro me temën ‘’Përfshirja e të miturve në krime kibernetike’’
Risi e kësaj konference këtë vit ishte pjesëmarrja e studentëve të drejtësisë nga universitete të tjera në vendin tonë.
Departamenti i Drejtësisë në Shkollën e lartë “Hëna e plotë” (Bedër) përfaqësoi për të 2-tën herë në konkursin e simulimit gjyqësor të Gjykatës Ndërkombëtare të Krimeve në Hagë.
Studentët Jonida Shtylla, Fatjona Halaj, Helena Dokaj, Amarildo Hoxha, Endri Çela përbëjnë ekipin garues në këtë konkurs ndërkombëtar.
Konkursi i simulimit gjyqësor të Gjykatës Ndërkombëtare të Krimeve u zhvillua nga data 17 deri më 22 maj 2015 në Hagë, Holandë. Ky konkurs mirëpreti universitete nga e gjithë bota, për një shkallë të madhe të debatit, duke simuluar punimet e Gjykatës Ndërkombëtare të Krimeve. Konkursi konsistoi në një program të ngjeshur arsimor dhe social, prej gjashtë ditësh, duke sjellë së bashku studentë me prejardhje dhe kultura të ndryshme në Hagë, për të sfiduar aftësitë e tyre si avokatë të ardhshëm ndërkombëtarë. Raundi përfundimtar u zhvillua në një sallë gjyqi aktuale me trup gjykues konkret të Gjykatës Ndërkombëtare Penale.
Konkursi përfshin bashkëpunimin me gjyqtarë nga gjykata ndërkombëtare, profesorë të së drejtës ndërkombëtare (penale) dhe profesionistë të tjerë ligjorë. Ky rrjet e bën konkursin një simulim real të seancave që zhvillohen në Gjykatën Ndërkombëtare Penale. Çështjet e konkursit i drejtohen çështjeve themelore të së Drejtës Penale Ndërkombëtare si procedurale ashtu dhe substanciale.
57 ekipe nga 38 vende të ndryshme të botës u regjistruan në edicionin e vitit 2015 në konkursin e stimulimit gjyqësor të Gjykatës Ndërkombëtare Penale.
Znj. Milena Harito, Ministre për Inovacionin dhe Administratën Publike, ishte e ftuar në kuadër të ciklit “Brownbag Seminars” e cila mbajti një leksion të hapur me studentët e Departamentit të Drejtësisë rreth temës: “Reformat në administratën publike, parakusht për anëtarësimin në Bashkimin Europian”.
Bashkëbisedimi me studentët u zhvillua në disa faza, fillimisht Znj Harito njohu të pranishmit me kompetencat, strukturën si dhe institucionet në varësi të ministrisë në fjalë. Më pas ajo bëri një përshkrim të shkurtër të reformave konkrete që janë ndërmarrë në administratën publike në shërbim të procesit të anëtarësimit në BE.
Aktiviteti vazhdoi më tej me pyetje të shumta nga studentët të cilët shprehën interes në fusha të tilla si: zëvendësimi i stafit të administratës sipas qëverive përkatëse, vizionin e ministrisë për të ardhmen, mundësitë që krijon kjo ministri për tregun e punës dhe konkretisht për profesionistët e rinj si dhe ndikimi i procesit të anëtarësimit në mirëfunksionimin e kësaj ministrie.
Gjatë vizitës në Universitetin Bedër, znj Milena Harito u shoqërua nga rektori i institucionit Dr. Ferdinand Gjana i cili ndër të tjera e njohu znj. ministre me muzeun e Medias dhe të Komunikimit.
Konkursi Ndërkombëtar Jessup, nën administrimin e ILSA-s bashkon studentë të drejtësisë nga i gjithë globi. Tashmë në vitin e tij të 56-të , Jessup është konkursi ndërkombëtar më i madh në botë për studentët e drejtësisë, me pjesëmarrës nga më shumë se 600 Universitete në mbarë botën.
Për të dytin vit radhazi, në Shkollën e lartë “Hëna e plotë” (Bedër) ka formuar një ekip studentësh të kualifikuar të së drejtës ndërkombëtare që do të mundësojnë përfaqësimin e Shqipërisë për të tretën herë në historinë e Jessup.
Konkursi simulon një çështje gjyqësore në Gjykatën Ndërkombëtare të Drejtësisë (ICJ), organi kryesor gjyqësor i Kombeve të Bashkuara. Që nga shtatori 2014 ekipi ka studiuar problematikën e çështjes gjyqësore në Jessup, e cili adreson efektin e një ndryshimi rrënjësor të rrethanave të një traktati dypalësh dhe çështjet procedurale dhe qenësore që dalin nga aneksimi i territorit të një kombi nga një tjetër.
Ekipi ka hulumtuar dhe ka përgatitur argumentet thelbësore me gojë për të përfaqësuar çdo anë të mosmarrëveshjes imagjinare.
Ekipi përfaqësuar nga studentët: Mandrit Kamolli, Ermira Shkreta, Emsal Ajredini, Eduart Gjoni dhe Albi Cela udhëtoi në Uashington për të paraqitur prezantimet përkatëse në një garë kokë me kokë me homologët e tyre, studentë nga e gjithë bota.Përfaqësimi i Shqipërisë në këtë konkurs nga Shkolla e Lartë “Hëna e Plotë” (Bedër) u bë i mundur falë mbështetjes nga Ambasada e Norvegjisë për Kosovën dhe Shqipërinë.
Z. Ilir Qafa, Drejtor i Përgjithshëm i Shërbimit të Provës ishte i ftuar nga klubi studentor “Bedër Law Academy” në një leksion të hapur ku ndau me studentët dhe të pranishmit pikëpamjet rreth “Rolit dhe Funksionimit të Shërbimit të Provës”.
“Ky institucion ka filluar të prodhojë efekte pozitive, të cilat lidhen në mënyrë të pashmangshme me rehabilitimin e personave në konflikt me ligjin, me uljen e recidivizmit apo zvogëlimin e shpenzimeve ekonomike që shoqërojnë vuajtjen e dënimit pranë institucioneve të edukimit dhe vuajtjes së dënimeve penale” – u shreh z. Qafa pasi bëri një rezyme të shkurtër të veprimtarisë së institucionit që ai drejton.
Bashkëbisedimi me studentët vashdoi më tej në formën e pyetje – përgjigjeve, ku z. Ilir Qafa analizoi qartë çdo fushë në të cilën studentët treguan interes. Përmendim këtu: dispozitat ligjore të kodit penal të Republikës së Shqipërisë, hapësira ku mund të veprojë Shërbimi i Provës, etj.
Znj. Mesila Doda, deputete në Kuvendin e Shqipërisë dhe kryetare e “Aleanca e Grave Deputete”, ishte e ftuar nga klubi studentor “Bedër Law Academy” në një leksion të hapur ku ndau me studentët dhe të pranishmit pikëpamjet rreth temës “Iniciativa e përbashkët gjinore dhe ligjore për mbrojtjen e të drejtave të grave”.
Znj. Mesila Doda bëri një prezantim të veprimtarisë së Aleancës duke theksuar se kjo aleancë ka arritur një bashkëpunim të gjerë mes të gjitha grave deputete përtej dallimeve partiake. Këto bashkëpunime konsistojnë në çështje që kanë të bëjnë më mbrojtjen e të drejtave të grave, rritjen e rolit të gruas në politikë dhe respektimin e kuotës gjinore në listat e kandidatëve. “Gratë duhet të bashkohen me njëra-tjetrën. Vetëm në këtë mënyrë mund të realizohet fuqizimi i tyre”- tha Znj. Doda duke përmendur në këtë mënyrë arritjet që ka patur ky organizim në Kuvendin e Shqipërisë por edhe në vende të tjera shqipfolëse si Kosova, Maqedonia dhe Mali i Zi.
Ndër të tjera, Znj. Doda u shpreh për ligjin për lustracionin si dhe për hapjen e dosjeve. Në lidhje me këtë të fundit, ajo theksoi se jemi shumë vonë në hapjen e dosjeve por gjithsesi ky është një hap i domosdoshëm që duhet ndërmarrë sa më shpejt nga politika shqiptare. Gjatë bashkëbisedimit, Znj. Doda vlerësoi disa propozime të studentëve në lidhje me analizimin e fuqisë ekonomike të gruas duke trajtuar mënyrën sesi gjykatat kanë bërë ndarjen e pasurisë në familje. Përveç kësaj, ajo u kërkoi studentëve të hartojnë një projekt në lidhje me këtë në mënyrë që ajo ta propozojë në parlament.
Nisma e studentëve të Drejtësisë në eleminimin e dhunës ndaj gruas
“Nga djemtë e burrat, kundër dhunës ndaj vajzave dhe grave” ishte ky dokumentari i organizaur nga Qendra Aleanca Gjinore për Zhvillim në Kinema “Millenium”.
Gjatë kësaj shfaqeje u mbajt një panel diskutimi ku referuan personalitete të ndryshme, si Zv.Ambasadori i SHBA në Tiranë, zv.ministrja e Arsimit, zv.ministrja e Ministrisë së Mirëqenies Sociale dhe Rinisë si dhe Drejtuesja e Linjës së Këshillimit për Gra e Vajza.
Klubi “Beder Law Academy” duke marrë pjesë në këtë organizim hapi kështu siparin e aktiviteteve në kuadër të ditëve të ndërgjegjësimit të shoqërisë rreth eliminimit të dhunës ndaj gruas.
Nga data 25 nëntor, Dita Ndërkombëtare për Eliminimin e Dhunës ndaj Gruas deri në 10 dhjetor njëkohësisht Dita e Të Drejtave të Njeriut ky klub do të organizojë një sër aktivitetesh me tematika të ndryshme.
Shumëllojshmëria e këtyre aktiviteteve konsiston në ndërgjegjësim të studentëve dhe shoqërisë se dhuna ndaj gruas është një fenomen i cili duhet luftuar deri në eleminimin e plotë nga shoqëria jonë.